Mayestro Raoul Guillaume, On Gwo Pye Flanbwayan Nan Istwa Mizik Peyi Nou.            

Yon Pèp san memwa se yon pèp san istwa. Aimé Césaire.  

 

Otofonik, sonje mayestro Raoul Guillaume, on gwo pye flanbwayan nan istwa mizik peyi nou.   

Raoul Guillaume kite tras li te pote anpil frechè nan fòlklò nou marye ak bèl pwezi, bèl melodi, ki jounen jodi anpil konpozisyonl tounen klasik nan repètwa mizik peyi nou. Mizisyen etranje kou natif natal jwe anpil bèl chanson ki te konn fè nou reve depi ti katkat jouk nou gran kit se pawòl oswa melodi ki fè pati batistè kiltirèl nou. Li kite anprent li ,mak fabrik li, si lòt mizik nan lòt peyi nan yon moman te anvayi le monn, mizik ayisyen an tou te fè chimen pa l gras ak talan Raoul.

Pwofesè Michel Soukar ekri on bon liv sou Raoul guillaume yon bèl omaj a gran konpozitè sila a. Raoul Guillaume reprezante epòk 50-60-70. Li te kolabore ak Issa El Saieh,Nemours, Sicot e latriye se te epòk dominiken te kòn vin pase wikenn ayiti,koute bèl mizik, boloze.  Lè sa a, peyi a te santi bon. Se te bèl epòk. Lannwit moun ap pwomennen channmas, bwè yon ti byè lan kafe, pase wikenn nan otèl. Papa m te konn di m peyi a te santi bon epòk prezidan Dumarsais Estime> Yo te rele tan sa a " bèl epòk".

Raoul Guillaume se te on pye flanbwayan ki t ap simaye bon van bon lodè santibon mizikalman "souvni ak nostalji". Li se te on bon pawolye tou. Gen chante li fè w ri tankou "Joseph". Gen dòt li fè w reflechi. Se te yon bon obsèvatè. Li ekri sou sila ki tap triminen yo tou, sila yo ki pat gen rele ni reponn yo li te wè sa k ap bat dlo pou fè bè lan" pouse bourèt chabon".

Raoul guillaume lan konpozisyon l yo ak bèl pwezi chante ( rapò bon vwazinay ,zanmitay, lanmou  ak lapenn. Li tire pòtre peyizan ki pa wè lavi pou yon grenn pitit li genyen sèl byen li posede ki prale kite l. "Complainte Peyisanne " youn pami bèl konpozisyon l.

Kokennchenn atis sa te saksofonis, konpozitè, chèf òkès, pawolye. Li te konn ekri tou pou michel desgrottes ,Edner Guillard ,Djo trouillot.

Si ou gen bezwen fè on ti bak an aryè, pou koute sa l kite pou nou, pa ezite, se bon terapi, ijyèn mantal.

Raoul te renmen foutbòl, mizik. Li pran prizon. Li te konnen ekzil. Nan ane 1964, li konpoze "vive le football", mizik ki te jwe nan tout estasyon radyo ann sonje match ( NEMOURS-SICOT )  estad sylvio cator.

Mizisyen ayisyen kou etranje  jwe konpozisyon Raoul. Pa egzanp, nou genyen Brandford Marsalis, Mikita Ozuma ,Oscar de la Pointe , Sonora Matancera san bliye tout gran atis ayisyen.
Istwa mayestro guillaume se gwo zafè moun ki gen zòrèy ,ki damou bèl mizik p ap janm bouke tande konpozisyon l yo. Raoul Guillaume se yon patrimwann.

Kite yon repons